Ernest Muçi po përjeton një periudhë të artë në Turqi. Sulmuesi i Kombëtares shkëlqeu edhe një herë në sfidën ndaj Goztepes, ku realizoi dopietë në transfertë, duke qenë njeriu kyç i fitores së Trabzonsporit.
Muçi zhbllokoi rezultatin në minutën e 46’, pas një aksioni individual që e përfundoi me gol, duke mos i lënë asnjë mundësi portierit vendas. Në minutën e 76’, ai goditi sërish, duke çuar shifrat 0-2 dhe duke vulosur suksesin e skuadrës.
Ky është një tjetër paraqitje mbresëlënëse për 23-vjeçarin shqiptar, i cili tashmë ka shënuar në tre ndeshje radhazi, duke grumbulluar plot pesë gola në këto përballje. Forma e tij e shkëlqyer është një sinjal i fortë edhe për trajnerin Sylvinho, duke treguar se Muçi është gati të rikthehet fuqishëm në Kombëtare.
Sulmuesi u shpall padyshim lojtari më i spikatur i takimit, ndërsa kontributi i tij po mban Trabzonsporin në garë për objektivat madhorë. Javën e ardhshme, Muçi do të përballet me Beshiktashin – klubin që më parë nuk i besoi dhe e dërgoi në huazim – duke i shtuar sfidës edhe më shumë simbolikë.
Pas ndeshjes, Muçi u shpreh i kënaqur me fitoren:
“Jam krenar për skuadrën time. Këto tre pikë janë shumë të rëndësishme dhe na motivojnë për sfidën e radhës.”
Ai shtoi se është i lumtur me formën e tij aktuale:
“Gjërat po shkojnë mirë dhe kjo më shtyn të punoj edhe më shumë. Mund të ëndërroj për më shumë, por e rëndësishme është të ruajmë vazhdimësinë.”
Me këtë ritëm, ylli shqiptar po konfirmohet si një nga lojtarët më decizivë të momentit në Superligën turke.
