Liverpool po kalon një periudhë të vështirë, por situata u përkeqësua edhe më shumë pasi Mohamed Salah shpërtheu në deklarata të ashpra pas barazimit 3–3 kundër Leeds United. Sulmuesi egjiptian, për të tretën ndeshje radhazi, mbeti në stol – dhe për herë të dytë brenda disa ditësh nuk luajti asnjë minutë.
“Nuk e pranoj këtë. Nuk e kuptoj pse më ndodh gjithmonë mua. ‘Sakrifikojmë Mo-n’, sepse ai qenka problemi. Por nuk mendoj se jam unë problemi,” tha Salah në zonën e intervistave pas ndeshjes.
33-vjeçari e cilësoi këtë situatë si të paprecedentë në karrierën e tij:
“Të jem 90 minuta në stol… është hera e tretë. E para në karrierën time. S’më besohet. Jam shumë i zhgënjyer. Kam bërë aq shumë për këtë klub, të gjithë e kanë parë. Dhe tani rri në stol, pa asnjë arsye. Ndihem si i tradhtuar.”
Sipas tij, dikush brenda klubit po e fajëson për rezultatet e dobëta:
“Mendoj se është shumë e qartë që dikush po më hedh fajin. Klubi më premtoi shumë këtë verë, por unë jam tre ndeshje në stol. Nuk besoj se e kanë mbajtur fjalën.”
Salah e drejtoi gishtin edhe te trajneri Arne Slot:
“Kam thënë shumë herë që kisha marrëdhënie të mirë me trajnerin, por papritur nuk e kemi më. Nuk e di pse. Më duket sikur dikush s’më do më këtu.”
Trajneri holandez justifikoi vendimin duke thënë se ndeshja kërkonte kontroll të lojës dhe jo një gol tjetër. Por ndërkohë, lojtarë si Ekitiké, Gakpo dhe Isak duket se e kanë kaluar Salah-n në hierarki.
Rindërtimi i marrëdhënies së tij me klubin është bërë edhe më i ndërlikuar nga negociatat e gjata të verës së kaluar për rinovimin. Megjithatë, Salah firmosi deri në vitin 2027, me pagë 23 milionë euro në sezon.
Salah vjen nga një nga sezonet më të mira të karrierës, me 34 gola në të gjitha garat në 2014–2015, dhe ka shënuar 250 gola në 420 ndeshje për Liverpool-in. Prandaj ulja në stol për tre ndeshje, dy herë pa luajtur fare, ka krijuar një tension të paprecedentë në Anfield.
Egjiptiani la të hapur edhe mundësinë e largimit:
“Nesër thirra nënën time. I thashë të vijë në ndeshjen me Brighton-in, edhe nëse nuk luaj. Dua ta shijoj, sepse nuk e di çfarë do të ndodhë. Do të jetë ndeshja ime e fundit para Kupës së Kombeve të Afrikës… dhe ndoshta më e fundit për Liverpool-in. Në futboll nuk i dihet kurrë.”
Salah do të bashkohet me kombëtaren e Egjiptit më 15 dhjetor, dhe ndeshja kundër Brighton mund të jetë e fundit e tij në 2025 — ose e fundit për klubin, nëse merkatoja e dimrit sjell surpriza.
