Inter Miami ka shkruar historinë në futbollin amerikan, duke fituar titullin e parë kampion në MLS pas një finaleje dramatike ndaj Vancouver Whitecaps, që u mbyll me rezultatin 3-1. Një ndeshje plot ritëm e emocion, ku yjet e mëdhenj bënë diferencën.
Skuadra nga Florida kaloi në avantazh që në minutën e 8-të, falë një autogoli të Edier Ocampo. Vancouver reagoi dhe arriti të barazojë me golin e Ali Ahmed, duke rikthyer tensionin në finalen e madhe.
Por në momentet kyçe, Lionel Messi mori skenën. Kapiteni argjentinas dha dy asistime vendimtare: të parin për Rodrigo De Paul në minutën e 71-të dhe të dytin për Tadeo Allede në minutën e 96-të, duke i dhënë Inter Miamit trofeun e parë të MLS Cup në histori.
Triumfi i mbrëmjes së sotme ka edhe një dimension emocional: Jordi Alba dhe Sergio Busquets, dy ish-yje të Barcelonës, mbyllën karrierat e tyre me një trofe të merituar në duar.
Një natë e paharrueshme për Inter Miamin dhe një tjetër faqe e artë në legjendën e Leo Messit.
