Barcelona ka zyrtarizuar sot rinovimin e kontratës me qendërmbrojtësin 24-vjeçar Eric Garcia, duke i dhënë fund spekulimeve dhe duke surprizuar fansat me shpejtësinë e nënshkrimit. Lajmi u publikua në faqen zyrtare të klubit katalanas në platformën X, ku u njoftua se marrëveshja e re do të jetë e vlefshme deri në vitin 2031.
“Nënshkrimi i kësaj kontrate tregon besimin tonë te një lojtar i rritur në La Masia, i cili është shembull për talentet e rinj. Paraqitjet, pjekuria dhe përkushtimi i tij kanë qenë vendimtare, duke forcuar edhe më shumë lidhjen me klubin,” thuhet në deklaratën e Barcelonës. “Eric Garcia do të vazhdojë të sjellë stabilitet, lidership dhe cilësi, dhe ky rinovim është një lajm që e feston i gjithë klubi – dhe padyshim edhe tifozët.”
Interesant është fakti që presidenti Joan Laporta kishte deklaruar se marrëveshja do të nënshkruhej javën e ardhshme, por procesi u përmbyll më herët se parashikohej.
Garcia iu bashkua Barcelonës në vitin 2021 si lojtar i lirë nga Manchester City. Gjatë sezonit 2023/24 ai ishte huazuar te Girona, ndërsa këtë sezon është rikthyer si pjesë e rëndësishme e skuadrës bluagrana, duke luajtur 20 ndeshje, ku ka shënuar një gol dhe ka dhënë një asist.
Kontrata e tij aktuale skadonte në verën e vitit 2026, ndërsa sipas Transfermarkt, vlera e tij në treg arrin në rreth 25 milionë euro.
