Në qytetin e Belshit, një gropë karstike e thellë mbi 10 metra dhe me diametër rreth 7 metra ka dalë në sipërfaqe pranë banesave në lagjen e spitalit. Ky fenomen natyror, i zakonshëm për zonën e Dumresë, e cila numëron mbi 84 liqene të krijuara nga proceset karstike, ka shkaktuar panik te banorët. Ata ndihen të rrezikuar pasi gropa po iu afrohet banesave dhe kërkojnë urgjent ndihmë nga strukturat e emergjencave.
Zona e Dumresë, që shtrihet në një sipërfaqe prej 360 km², është e njohur për formimin e gropave karstike si rezultat i shkrirjes së shkëmbinjve të gipsit dhe gëlqeres. Prania e këtyre karstikave po shfaqet gjithnjë e më shpesh; përveç gropës së fundit, në qershor të këtij viti, një gropë e ngjashme u shfaq në fshatin Dëshiran, ndërsa një tjetër kishte ndodhur në maj të vitit 2022 pranë banesave në Cestije të Belshit.
Situata është bërë edhe më shqetësuese për banorët për shkak të kushteve të motit me shi, të cilat rrisin rrezikun e rënies së më shumë gropave. Kjo ka bërë që banorët të ndihen të pasigurt dhe të shqetësuar për sigurinë e tyre. Ekpertë të emergjencave dhe gjeologut duhet të angazhohen për të vlerësuar rrezikun dhe për të ofruar zgjidhje për të parandaluar dëme të mëtejshme.
