Pronari i një karburanti është ekzekutuar mbrëmjen e sotme në Elbasan. Edmond Hyka i njohur edhe si Mondi Mëhalla është qëlluar me dy plumba në kokë dhe ka ndërruar jetë në vend.
Sipas informacioneve, Edmond (Mondi) Mëhalla është qëlluar teksa ndodhej brenda makinës së tij të parkuar pranë karburantit po në pronësi të tij, në unazën jugore të qytetit.
Atentati duket të ketë qenë i mirëorganizuar, ndërsa mbetet e paqartë nëse kamerat e biznesit kanë arritur të filmojnë autorët.
43 vjeçari është qëlluar me dy plumba në kokë, dhe u gjet i pajetë brenda makinës tip “Range Rover”, në karburantin “Xhaxhi Oil” në pronësi të tij. Mehalla ishte edhe pronar i një shërbimi taksi në qytetin e Elbasanit, i quajtur “El Taxi”.
