Jon Bon Jovi ka krijuar një model unik social përmes JBJ Soul Kitchen, një zinxhir restorantesh në New Jersey ku çdo person mund të hajë një vakt të plotë, pavarësisht nëse ka apo jo mundësi financiare. Restoranti drejtohet nga Dorothea Bongiovi, bashkëshortja e artistit dhe funksionon me një koncept të veçantë; klientët mund të japin një donacion të sugjeruar prej 20–30 dollarësh ose mund të kontribuojnë duke punuar vullnetarisht në restorant. Ky model nuk konsiderohet bamirësi, por një formë fuqizimi. Ata që nuk kanë mundësi të paguajnë, fitojnë ushqimin e tyre duke kontribuar në kuzhinë, në shërbim apo në pastrim.
Stafi ndihmon komunitetin edhe në probleme praktike, si sigurimi i strehimit, kujdesit mendor apo dokumenteve identifikuese. Këtë mision e mbështet edhe Nicole Dorrity, një punonjëse që dikur ka kaluar vetë periudhë të të pastrehëve, duke e bërë më të lehtë për të kuptuar dhe ndihmuar ata që përballen me të njëjtat sfida.
Në Toms River, kryebashkiaku kundërshtoi një program të përkohshëm drekash në bibliotekë, duke pretenduar se tërhiqte të pastrehë në zonë. Bon Jovi e cilësoi programin thjesht një përpjekje për të ushqyer njerëzit në nevojë me vakte të thjeshta si supë, sallatë dhe sanduiçe. Megjithatë, Soul Kitchen vazhdon të marrë vlerësime të larta për cilësinë e ushqimit. Në dy qytete, restorantet renditen të parat në TripAdvisor dhe janë pjesë e listës prestigjioze “Best of the Best 2023”, duke hyrë në 1% të bizneseve më të vlerësuara në platformë.
