Në sallën e Kuvendit është duke u zhvilluar këtë të enjte interpelanca mes deputetes së Partisë Demokratike, Ina Zhupës dhe ministres së Arsimit, Ogerta Manastirliu lidhur me ngjarjen e rëndë të ndodhur jashtë ambienteve të shkollës “Fan Noli”, ku humbi jetën 14-vjeçari Martin Cani si dhe u plagos shoku i tij, Luis Meçja.
Teksa ka listuar një për një të gjitha arritjet e qeverisë dhe Ministrisë së Arsimit sa i përket sigurisë së fëmijëve nëpër shkolla, ministrja “sulmoi” demokratët e kryesisht kolegen Ina Zhupën duke i thënë se shfrytëzoi këtë ngjarje politikisht.
Sipas ministres Manastirliu kjo ngjarje u përdor nga opozita për të dhënë një shembull të keq duke u bërë problem.
“U ngrite në foltore të flisje për problemin dhe u bëre vetë problemi. Shembulli që përcillet nga kjo sallë lidhet direkt me edukimin e fëmijëve. Ajo ngjarje na ka prekur të gjithëve, të gjithë komunitetin. Shumë dhimbje. Të përsëris, siç kam bërë çdo herë që kam pasur mundësi gjatë këtyre javëve, thirrjen time për të mos e politizuar një ngjarje që vetëm politike nuk është”, tha Manastirliu.
Pjesë nga fjala e minsitres:
Gjuha e urrejtjes, fyerja, kanosja janë shembulli më i keq që mund t’i japim fëmijëve nga kjo sallë. Janë shërbimi më i keq që mund t’i japim prindërve dhe qytetarëve. Dhe ju zonjë deputete nuk vonuat ta jepnit shembullin tuaj të keq nga kjo sallë. Fyeve rëndë një koleg të nderuar të këtij Kuvendi. Ti kishte kërkuar një interpelancë urgjente dhe përdore një gjuhë urrejtjeje. Qytetarëve nga anët e tua u ka ardhur turp që të kanë dëgjuar, prindërve dhe mësuesve që edukojnë fëmijët tanë u ka ardhur turp për atë që kanë dëgjuar.
U ngrite në foltore të flisje për problemin dhe u bëre vetë problemi. Shembulli që përcillet nga kjo sallë lidhet direkt me edukimin e fëmijëve. Ajo ngjarje na ka prekur të gjithëve, të gjithë komunitetin. Shumë dhimbje. Të përsëris, siç kam bërë çdo herë që kam pasur mundësi gjatë këtyre javëve, thirrjen time për të mos e politizuar një ngjarje që vetëm politike nuk është.
Gjithsecili duhet të bëjë pjesën e vet për ta parandalur në të ardhmen këtë ngjarje. Të shfrytëzosh dhimbjen e të tjerëve do të thotë ta kesh dhembshurinë në nivele të papërfillshme. Ministria e Arsimit ka një rol kryesor për krijimin e ambientev të sigurta në shkolla. Për ngjarjen në fjalë janë marrë të gjitha masat për zbardhjen e saj. Ngjarje tragjike që përfhisjnë dhunën mes të miturve janë të dhimbshme dhe kërkojnë zgjidhje serioze dhe të koordinuara. Dua t’iu siguroj se ministria e Arsimit mbetet e angazhuar për fuqizimin e mëtejshmë të mekanizmve të parandalmit të dhunës në shkolla. Në këto vite ka pasur një vëmendje maksimale mes institucioneve përgjegjëse për ta ngritur në një nivel më të lartë masën e sigurisë për mbrojtjen e nxënësve brenda dhe jashtë shkollave.
