Gazetari Artan Hoxha ka zbuluar procedurat nëpër të cilat kaloi në doganë para se të shpallej “non grata” nga Greqia.
Ai theksoi se oficeri i kufirit e veçoi atë dhe pasi i bëri disa pyetje i bëri foto, i mori shenjat e gishtërinjëve dhe i skanuan retinën e syrit.
“Oficeri i kufirit, më tha: po shoh këtu në sistem që kemi problem. Duhet të kalosh në vijën e dytë se s’ta jap pashaportën, duhet të shkosh atje të marrësh pashaportën. Në vijën e dytë ishte një oficer tjetër, i cili bëri në fillim disa pyetje për gjeneralitetet. Pastaj, pyeti: ti e ke bërë këtë historinë? Duke filluar që nga masakra e Peshkëpisë, pastaj kishte zhvarrimet e Kosinës, ato të ushtarëve grekë, pra varrezat e ushtarëve grekë, deri te ngjarjet e fundit me Kacifas dhe këto me Belerin.
Ai bëri vetëm pyetje. Dhe ajo që më bëri përshtypje ishte se kur kalova në vijën e dytë ai më kërkoi që të lë gjurmët e gishtave dhe të bëj foto dhe retinën e syrit dhe e di shumë mirë se për çfarë duhen këto dhe atë moment i them që unë nuk jam kriminel. Unë e dyta, i thashë, nuk di të kem ndonjë proces penal në Greqi. Ai tha, “jo, nuk ka lidhje me këtë, është thjesht procedurë”. Mbarojmë me ato, më la aty në pritje dhe më tha se do të vinte ai i emigracionit”,tregon Hoxha për “A2CNN”.
