Një bisedë e publikuar nga Bloomberg ka hedhur dritë mbi diskutimet mes Steve Witkoff, emisar i Presidentit Donald Trump, dhe Yuri Ushakov, këshilltar i lartë i Presidentit rus Vladimir Putin, lidhur me mundësinë e një plani paqeje për Ukrainën. Telefonata është zhvilluar më 14 tetor, vetëm pak ditë pas nënshkrimit të një marrëveshjeje për Gazën, dhe ka zgjatur mbi pesë minuta.
Gjatë bisedës, Witkoff i sugjeroi Ushakovit që Putini të niste një komunikim të drejtpërdrejtë me Trump për çështjen e Ukrainës. Sipas tij, një kontakt i tillë do të ishte shumë i vlefshëm për nisjen e një dialogu konstruktiv mes dy liderëve. Ai propozoi që Ushakov ta informonte Putinin për marrëveshjen e arritur për Gazën dhe t’i hapte rrugën një telefonate të mundshme me Trump për situatën në Ukrainë.
Kur Ushakov shfaqi interes për diskutimin e një plani të mundshëm paqeje, Witkoff përmendi idenë e përpilimit të një dokumenti me 20 pika, të ngjashëm me modelin e përdorur për Gazën. Ai theksoi se çdo përpjekje drejt kompromisit do të ishte e dobishme dhe se të dy vendet duhej të kishin një qëllim të përbashkët: arritjen e paqes.
Në mbyllje të bisedës, Witkoff shprehu dëshirën që të krijohej mundësia e një takimi me Putinin përpara vizitës së planifikuar të Presidentit ukrainas Volodymyr Zelensky në Shtëpinë e Bardhë. Ai nënvizoi rëndësinë e një komunikimi të shpejtë dhe të drejtpërdrejtë mes palëve, duke sugjeruar se negociatat për paqe duhet të avancoheshin para këtij takimi. Ushakov, nga ana e tij, u zotua se do ta informonte Putinin dhe do të kthehej me një përgjigje.
