Ambasadori i BE-së në Shqipëri, Silvio Gonzato ka dënuar sjelljen e opozitës në Kuvend. Ditën e djeshme deputetët demokratë dogjën karriget e tyre dhe hodhën sende të forta në drejtim të kryeparlamentaret Elisa Spiropali dhe anëtarëve të tjerë të mazhorancës.
Ambasadori Gonzato foli në Asamblenë Parlamentare të Nismës për Europën Qendrore, e cila po zhvillon punimet në Tiranë. Ai shprehu keqardhje për veprimet e opozitës dhe ka thënë se kjo nuk është mënyra e duhur për të shprehur mendimin.
“Është për të ardhur keq që për një çështje tjetër disa përfaqësues të opozitës përdorën mënyra që ndërpresin mbarëvajtjen e jetës parlamentare në Kuvend. Është për të ardhur keq. Për çfarëdo ideje që kemi nuk është kjo mënyra oër ta shprehur mendimin. Në një demokraci funksionale si Shqipëria pakënaqësitë duhet të shprehen në mënyrën e duhur e nuk duhet të përdoren dhunë apo dëmtime ndaj pronës për të shprehur mendimin, deputetët e Kuvendit duhet të kenë mundësinë të përmbushin rolin e tyre në siguri të plotë”, tha Gonzato.
Gonzato bëri gjithashtu thirrje për tu kthyer në dialog dhe të ndalohet përshkallëzimi i situatës si dhe të shmangen sulmet personale dhe verbale.
Opozita riktheu tensionet në Kuvend pas dënimit të Ervin Salianjit me një vit burg për kallëzim të rremë. Salianji u dënua më 26 shtator nga Gjykata e Apelit me vendim të formës së prerë dhe dënimin do ta vuajë në burgun e Fierit.
Opozita e ka quajtur dënimin e tij politik dhe ka paralajmëruar se nuk do të ketë më qetësi në seancat plenare./ilirianews
