Dy të rinj nga Teksasi janë vënë nën akuzë për një komplot të rëndë që synonte marrjen nën kontroll të një ishulli të largët në Haiti, duke përdorur forcë të armatosur. Sipas prokurorëve federalë, ata dyshohet se kishin hartuar plane të dhunshme dhe të paligjshme për banorët e ishullit.
Gavin Rivers Weisenburg, 21 vjeç, dhe Tanner Christopher Thomas, 20 vjeç, janë akuzuar nga Prokuroria e Qarkut Lindor të Teksasit për komplot që lidhet me vrasje, dhunë apo rrëmbim në një vend të huaj. Gjithashtu, ata përballen me akuza të rënda që lidhen me shfrytëzimin e një të mituri.
Sipas dokumenteve gjyqësore, të dyshuarit dyshohet se planifikonin të rekrutonin persona të pastrehë nga zona e Washingtonit, të blinin një jaht dhe të organizonin një operacion për të sulmuar ishullin Gonâve, i cili ka rreth 87 mijë banorë. Ata kishin bërë kërkime për pajisje të armatosura dhe kishin hartuar plane logjistike për muaj të tërë.
Avokatët mbrojtës mohojnë akuzat, duke theksuar se klientët e tyre nuk kanë ndërmarrë asnjë hap real drejt realizimit të këtij plani. Sipas tyre, prokuroria do të përballet me vështirësi për të provuar që dy të rinjtë kishin synim të vërtetë për të kryer veprimet e pretenduara.
Dokumentet e akuzës tregojnë se hetimet për planifikimin e këtij komploti datojnë nga gushti i vitit 2024, ndërsa Weisenburg madje kishte nisur edhe një trajnim për përdorimin e armëve të zjarrit, por nuk e kishte përfunduar.
Nëse shpallen fajtorë, të akuzuarit rrezikojnë deri në 30 vjet burg për akuzat që lidhen me shfrytëzimin e të miturit dhe deri në burgim të përjetshëm për akuzën e komplotit të dhunshëm.
