Izraeli njoftoi të dielën mbrëma se ka eliminuar Haitham Tabatabain, të cilin e përshkruan si shefin e shtabit të Hezbollahut, në një sulm të kryer në jug të kryeqytetit libanez, Beirut. Sipas autoriteteve lokale, sulmi shkaktoi pesë të vdekur dhe 28 të plagosur. Ky është sulmi i parë izraelit në Beirut që prej majit të kaluar.
Hezbollah konfirmoi se një “figurë e rëndësishme” e organizatës mund të ishte vrarë, pa dhënë fillimisht detaje. Ndërkohë, Mahmoud Qamati, nënkryetari i këshillit politik të grupit, tha se udhëheqja po shqyrton një përgjigje të mundshme, duke paralajmëruar se sulmi mund të çojë në përshkallëzim të operacioneve në të gjithë Libanin.
Ministri izraelit i Mbrojtjes, Israel Katz, deklaroi se Izraeli do të vazhdojë të veprojë me forcë kundër çdo kërcënimi ndaj banorëve të veriut dhe sigurisë së shtetit. Nga ana tjetër, presidenti libanez Joseph Aoun e dënoi ashpër sulmin, duke akuzuar Izraelin për shkelje të marrëveshjes së armëpushimit dhe duke kërkuar ndërhyrje të menjëhershme ndërkombëtare për të ndaluar sulmet ndaj Libanit.
Tabatabai drejtonte njësinë elitare Radwan të Hezbollahut dhe konsiderohej pasardhësi i Ibrahim Akil, i vrarë në sulmet izraelite vitin e kaluar që goditën drejtuesit më të lartë të grupit, përfshirë edhe liderin Hassan Nasrallah.
Forcat izraelite thanë se Tabatabai “komandonte shumicën e njësive të Hezbollahut dhe punonte për rikthimin e tyre në gatishmëri të plotë për një konflikt të mundshëm me Izraelin”. Ndërkohë, Ministria e Jashtme izraelite e justifikoi goditjen duke thënë se ishte përgjigje ndaj shkeljeve të përsëritura të armëpushimit nga ana e Hezbollahut.
Ngjarja ka rritur ndjeshëm shqetësimet për një përshkallëzim të mëtejshëm të tensioneve në Lindjen e Mesme.
