Kreu i Partisë Demokratike, Sali Berisha, po mban fjalimin e tij para Kryeministrisë, në kuadër të protestës së thirrur nga opozita.
Ai e cilësoi këtë tubim si një “foltore parlamento-qytetare”, duke e përshkruar si një platformë të re të demokratëve dhe mbështetësve të opozitës.
Berisha e krahasoi lirinë me një lumë që nuk mund të ndalet, duke theksuar se çdo përpjekje për ta bllokuar do të çajë një kanal të ri. Ai deklaroi se protesta zhvillohet “para pallatit të krimit shtetëror”, duke akuzuar qeverinë aktuale për zëvendësimin e shtetit shqiptar me një “narko-shtet”.
Në fjalën e tij, ish-kryeministri akuzoi kryeministrin Edi Rama dhe bashkëpunëtorët e tij për krime ndaj shqiptarëve, duke thënë se politikat e tyre kanë detyruar më shumë qytetarë të largohen nga vendi se çdo pushtues në historinë kombëtare.
Ai shtoi se qeveria ka rikthyer vendin një shekull pas në zhvillim, duke e cilësuar si një regjim të bazuar në korrupsion dhe plaçkitje.
“Në këtë foltore parlamento-qytetar dhe kudo që jeni, të dashur demokrat, mbështetës të opozitës, parlamentarë. Miqtë emi, liria është si një lumë. Të cilin në asnjë lloj përpjekje nuk mund të ndalësh nuk mund ta përthash. O guxove ta bllokosh ajo do çajë një kanal. Pikërisht, kjo është platforma parlamentaro-qytetar, që inagurojmë sot, para pallatit të krimit. Para pallatit të krimit shtetëror, ndaj shtetit shqiptar.
Zëvendësimit të tij me narko shtetin. Para pallatit të krimit njerëzor ndaj shqiptarëve që me qëndrimet e tij përzuri nga Shqipëria në vitet e qeverisjes së tij më shumë se çdo pushtues i egër në tërë historinë kombëtare. Para pallatit që me krim monstruoz i zvogëloi dhe i riktheu 100 vite prapa. Para pallatit që ka brenda diktatorin, sulltanin dhe sulltaneshën, Edvinin dhe Lubinë, që me vjedhjen plaçkitjen tyre kanë mbjellë skamje në këtë vend si në asnjë vend tjetër të kontinentit.
Përpjekjet e opozitës , për zgjedhje dhe rotacion u përballën me tonelatat e eurove të drogës. U përballën me ushtrinë terroriste të patronazhistëve, terroristë të votës, me të gjithë burimet financiare, njerëzore, logjistike të gjithanshme të shtetit mafioz, të narko shtetit. Vetëm e vetëm se rotacioni largimi nga pushteti i tyre është tmerr nga krimet që kanë kryer.” – tha Berisha.
