Granit Xhaka ka shfaqur respekt të madh për Përfaqësuesen e Kosovës. Pas fitores së Zvicrës 4:1 ndaj Suedisë, mesfushori i Sunderlandit komentoi edhe suksesin historik të Kosovës ndaj Sllovenisë në Lubjanë.
Xhaka kontribuoi me gol për Zvicrën, e cila duket se ka pozicionin e parë pothuajse të sigurt në Grupin B, me 13 pikë – tre më shumë se Kosova, që ndodhet në vendin e dytë pas triumfit 2:0 ndaj Sllovenisë dhe kualifikimit për Play Off.
“Ne pothuajse e kemi siguruar kualifikimin. Do të donim shumë ta festonim sot këtë arritje. Por ajo që ka treguar Kosova deri tani, vërtet meriton respekt. Sigurisht, atyre u duhet një fitore 6:0, por prapë nuk mund ta marrim këtë ndeshje si të lehtë,” u shpreh Xhaka.
Ndeshja vendimtare mes Kosovës dhe Zvicrës do të luhet të martën në Prishtinë.
