Personat që do të kenë marrë azil në Mbretërinë e Bashkuar do të duhet të presin 20 vite përpara se të aplikojnë për t’u vendosur përgjithmonë, sipas planeve që pritet të njoftohen nga Sekretarja e Brendshme Shabana Mahmood të hënën.
Ndryshimi i madh në politikën e azilit vjen ndërsa qeveria kërkon të zvogëlojë kalimet me anije dhe kërkesat për azil.
Sipas planeve, personat që marrin azil do të lejohen të qëndrojnë në Mbretërinë e Bashkuar vetëm përkohësisht, me statusin e tyre të refugjatit që rishikohet rregullisht dhe atyre, vendet e të cilëve konsiderohen të sigurta, u thuhet të kthehen.
Aktualisht, statusi i refugjatit zgjat pesë vjet, pas së cilës njerëzit mund të aplikojnë për leje qëndrimi të pacaktuar.
Tani sekretarja e brendshme, po parishikon që edhe periudha e rishikimit të statusit të refugjatit të shkurtohet në 2 vite e gjysmë nga 5 që ishte.
Mahmood i tha gazetës Sunday Times se reformat ishin “të dizajnuara në thelb për t’u thënë njerëzve: mos vini në këtë vend si migrantë të paligjshëm, mos hipni në anije.Migrimi i paligjshëm po e shkatërron vendin tone. Nëse nuk e zgjidhim këtë, mendoj se vendi ynë do të përçahet shumë më tepër”.
Edhe Danimarka ka një politikë të ngjashme ku refugjatëve u jepen leje qëndrimi të përkohshme, zakonisht dyvjeçare, dhe në fakt duhet të riaplikojnë për azil kur ato skadojnë.
