Kryeministri Edi Rama ndodhet në Njësinë 3 në Tiranë, ku po flet për buxhetin 2026.
Por ai u ndal edhe tek kryetari i Bashkisë së Tiranës, Erion Veliaj. Sipas kryeministrit, shpallja e zgjedhjeve në Tiranë nuk ishte një hap fajësimi për Erion Veliajn, por për të mirën e qytetarëve.
Rama: Duhet të ishte kryetari i bashkisë këtu. Është për të ardhur keq. Ka shumë gjëra për t’u ardhur keq. Por në fund fare s’ka pse të na vijë keq. Kur Veliaj u mor nga zyra për t’u mbyllur në qeli pa gjyq, atëherë për herë të parë e ngrita zërin sa i përket drejtësisë. Cila do qoftë arsyeja pse drejtësia heton kryetarin e bashkisë, janë të pamjaftueshme si arsye, për sa kohë nuk është kapur në flagrancë duke bërë një krim, apo nuk ka vrarë njeri.
Drejtësia është e pavarur, falë një hapi të jashtëzakonshëm që ka bërë PS për ta bërë drejtësinë të pavarur në Shqipëri. Në të gjitha shkallët ku Veliaj kërkoi kthimin në detyrë, e humbi gjyqin. Dhe kur u rezervuan të gjitha shkallët, ishte koha të mendohej për qytetarët. Kjo ishte edhe arsyeja pse ne morëm rrugën tjetër, atë të zgjedhjeve. Nuk ishte një hap për të fajësuar kryetarin e bashkisë, por një hap i lidhur me faktin që Veliaj ishte në pamundësi për të kryer detyrën. Asnjë qytet nuk mund të qeveriset me delegim apo telekomandë, pavarësisht përpjekjeve që bëmë, nuk ia dolëm.
