Mjegulla e dendur ka përfshirë juglindjen e vendit, duke krijuar vështirësi në qarkullimin rrugor për rreth 30 kilometra, nga zona e Grabovicës së Pogradecit deri në hyrje të qytetit të Korçës.
Ky segment është zhytur plotësisht në mjegull të thellë, duke reduktuar dukshmërinë dhe duke detyruar drejtuesit e automjeteve të ulin ndjeshëm shpejtësinë.
Për shkak të kushteve të vështira atmosferike, Policia Rrugore ka bërë thirrje për kujdes maksimal, respektim të distancës së sigurisë dhe shmangie të çdo manovre të rrezikshme, me qëllim parandalimin e aksidenteve të mundshme.
Ndërkohë, temperaturat në juglindje kanë zbritur deri në 0°C gjatë ditës së sotme, një tregues i afrimit të plotë të dimrit.
Sinoptikanët paralajmërojnë se moti pritet të përkeqësohet, me reshje të rrëmbyeshme shiu të cilat do të mbizotërojnë gjatë ditëve në vijim.
