Kërkesat e lojtarëve janë dëgjuar. Pas ankesave të shumta për kalendarin e ngjeshur dhe lodhjen e tepërt, FIFA ka premtuar masa konkrete për të mbrojtur mirëqenien e futbollistëve.
Sipas njoftimit zyrtar, do të krijohet një Forum Konsultativ për Lojtarët Profesionistë, që synon të ofrojë mbështetje të plotë dhe të marrë parasysh shqetësimet e tyre.
Ndër vendimet më të rëndësishme, FIFA ka propozuar:
- Pushim të detyrueshëm prej të paktën 72 orësh mes ndeshjeve, për të shmangur lodhjen dhe dëmtimet;
- Pushim minimal 21-ditor midis sezoneve, për rikuperim të plotë fizik e mendor.
Për më tepër, organizata do të krijojë një Fond të Lojtarëve Profesionistë me vlerë 20 milionë dollarë për periudhën 2026–2029, që do të ndihmojë futbollistët që nuk marrin pagat e tyre për shkak të problemeve financiare të klubeve.
Megjithatë, ndryshimet nuk do të hyjnë në fuqi menjëherë: ato do të zbatohen me hyrjen në fuqi të kalendarit të ri ndërkombëtar të ndeshjeve në vitin 2031.
