Gazetarja Klodiana Lala ka komentuar zhvillimet më të fundit për hetimin e 21 janarit, duke theksuar se SPAK pritet të zbardhë arsyet pse Prokuroria e Përgjithshme nuk zbatoi urdhrat në atë kohë.
Sipas Lalës, pas vendimit të Gjykatës së Lartë që e cilësoi çështjen në kompetencë të SPAK, janë kryer një sërë veprimesh hetimore, përfshirë marrjen e komunikimeve radio dhe dëshmive të reja.
“SPAK-u në fillim nuk e mori këtë çështje dhe tha që i takon Prokurorisë së Tiranës. Më pas, e veja e Aleks Nikës e ndoqi çështjen deri në Gjykatën e Lartë, e cila vendosi se kompetenca i përkiste SPAK-ut.
Prej asaj kohe janë kryer disa veprime hetimore dhe janë pyetur persona të përfshirë në ngjarje,” u shpreh Lala.
Gazetarja theksoi se hetimi mund të zgjerohet edhe në nivel politik: “Për të pasur një hetim të plotë duhet të thirret edhe zoti Edi Rama, ndërsa ish-prokurorja e përgjithshme e asaj kohe, Ina Rama, duhet të japë shpjegime se pse nuk u lejua Prokuroria e Përgjithshme të zbatojë urdhrat e saj.”
