Një skandal i rëndë është zbuluar në Greqi, ku një prift 46-vjeçar, i cili kishte shërbyer në një zonë të Atikës, u arrestua nën akuzat për përdorim dhe trafikim të drogës, konkretisht kokainës dhe kanabisit, që i fshehiste brenda kishës.
Ky individ, i cili ishte shkarkuar nga Kisha Ortodokse e Greqisë, kishte vazhduar të paraqitej si prift dhe madje si “Kryepeshkopi i Kalendaristëve të Vjetër”.
Sipas raportimeve, prifti dyshohet se ka pranuar para policisë se ai vetë ishte përdorues droge dhe se fshihte substancat ilegale në kishë.
Hetimet sugjerojnë se ai ishte pjesë e një bande kriminale, e cila merrej me trafikimin e drogave dhe emigrantëve.
Drejtuesi i bandës, sipas mediave vendase, e rekrutoi atë dhe e bindit për të bashkëpunuar, duke u dhënë udhëzime në lidhje me aktivitetet e paligjshme.
Një banor i zonës tregoi për televizionin MEGA se prifti pretendonte se kishte aftësi të shëronte sëmundje si kanceri, duke mashtruar besimtarët dhe përfituar para prej tyre.
Ky banor përshkroi episodin e tij të parë me priftin, duke thënë se ai ishte zemëruar kur iu kërkua të ulte zërin e altoparlantëve të tij.
Gjatë hetimeve janë zbuluar biseda mes priftit dhe anëtarëve të bandës, ku ata përdornin terma të koduar për të diskutuar drogën, si “qiri” për kokainën dhe “kafe” për kanabisin.
Prifti, kur u arrestua, e pranoi fajin, por pritet që më vonë të ndryshojë qëndrim dhe të deklarojë se nuk di asgjë.
Policia vazhdon hetimet për të identifikuar anëtarët e tjerë të rrjetit dhe ata që kanë blerë drogë nga kjo bandë.
