Kompania “NewCo Ferronikeli Complex L.L.C.” ka njoftuar se do të fillojë një proces të largimeve kolektive, në përputhje me Ligjin e Punës. Ky vendim vjen si rezultat i pamundësisë për të operuar me të gjithë punëtorët për shkak të një ndalimi të gjatë të aktiviteteve prodhuese dhe kushteve të vështira të tregut, të cilat kanë ndikuar negativisht në shitje dhe fitime.
Në një komunikatë për mediat, kompania thekson se pas dy vitesh të vështira në përpjekjen për të mbajtur operacionet dhe ruajtur të gjitha vendet e punës që nga ndalimi i plotë i prodhimit në tetor 2023, situata financiare është bërë gjithnjë e më e paqëndrueshme. “Kostot fikse operative, pagat dhe mirëmbajtja e kompleksit janë financuar nga kompania pronare gjatë kësaj periudhe,” thuhet në njoftim.
“NewCo Ferronikeli” ka qenë e përballur me luhatjet në tregjet globale të metalit dhe rritjen e çmimeve të energjisë, faktorë të jashtëm që kanë rritur ndjeshëm kostot e prodhimit. Pavarësisht përpjekjeve për uljen e kostove dhe mbajtjen e fuqisë punëtore aktive, mungesa e të ardhurave ka ndikuar negativisht në stabilitetin financiar të kompanisë.
Ajo që është theksuar është se pas një vlerësimi të kujdesshëm, menaxhmenti ka arritur në përfundimin se ruajtja e fuqisë punëtore aktuale pa prodhim është e pamundur. Çdo punonjës i prekur do të marrë të drejtat e tij ligjore deri në datën e ndërprerjes, dhe njoftimet individuale do të lëshohen sipas procedurave ligjore.
Megjithatë, kompania ka shprehur përkushtimin e saj për një proces të drejtë dhe transparent. “NewCo Ferronikeli” planifikon të rikthejë punonjësit e prekur për sa kohë që kushtet e tregut lejojnë rifillimin e prodhimit. Po ashtu, një numër i vogël punonjësish do të mbeten për të menaxhuar licencat minerare dhe për t’u përmbushur detyrimet ligjore.
Në qershor të vitit 2022, grupi Yildirim, një konglomerat turk, kishte nënshkruar marrëveshjen për blerjen e “NewCo Ferronikeli”, i cili është një prej prodhuesve më të mëdhenj të hekurit dhe nikelit në Evropë. Ferronikeli, i privatizuar në vitin 2006, ka kaluar nën pronësinë e Grupit BALFIN deri në këtë blerje.
