Është zbardhur dëshmia e 27-vjeçarit Julian Gjoshi, i cili u vetëdorëzua ditën e djeshme në polici pasi dy ditë më parë ekzekutoi 50-vjeçarin Alfred Dedja në Ndroq.
Julian Gjoshi, banues në Shijak vendosi t’i japte fund arratisë dhe të dorëzohej pranë bluve të Tiranës, por nuk kishte pranuar të fliste.
Vetëm pas disa tentativash për ta marrë në pyetje, ai ka folur para hetuesve duke treguar se motivi i vrasjes është se Alfredi e ofendonte tek persona të tretë.
Ai ka dëshmuar se me viktimën njihej prej vitesh dhe ishin miq, por mbi të gjitha se ky e kishte ndihmuar dhe “mbajtur me bukë”.
Për sa i përket armës së krimit, 26-vjeçari ka deklaruar se pasi ka kryer vrasjen, e ka hedhur nga xhami i makinës në Ndroq, jo shumë larg nga vendi i ngjarjes.
“Fredi më shante, më shante mua nëpër tavolina. Mua ma thanë të tjerë këtë gjë, e mora vesh që më ofendonte dhe më ulte në syte e të tjerëve. Unë e kam mbajt me bukë atë e kam pas shok, ai më shante pas krahëve. Erdha tek lokali, aty e pashë, nuk durova dot më. Sapo e pashë e vrava.”
Policia gjeti makinën e braktisur ditën e djeshme në zonën e Shkëmbit të Kavajës, por jo armën e krimit. I pyetur mbi këtë Julian Gjoshi ka rrëfyer se e ka hedhur nga xhami i makinës në Ndroq, jo shumë larg nga vendi i ngjarjes.
“Pasi e vrava, armën e kam hedhur ne një kanal jo shumë larg nga vendi i ngjarjes”, – tha ai.
