Pesë migrantë kanë humbur jetën dhe rreth 40 të tjerë janë të zhdukur si pasojë e fundosjes së një anijeje në brigjet jugperëndimore të ishullit të Kretës, njoftuan autoritetet greke.
Sipas rojes bregdetare, 39 persona janë shpëtuar deri tani, ndërsa kërkimet për të zhdukurit vazhdojnë prej orëve të para të mëngjesit. Mediat lokale raportuan se disa prej të shpëtuarve janë dërguar me helikopterë në spital dhe ndodhen nën kujdes intensiv.
Anija u fundos gjatë përpjekjes për të transportuar migrantë që po përpiqeshin të arrinin në Greqi, një destinacion kryesor për ata që tentojnë të kalojnë në Bashkimin Evropian nga Lindja e Mesme, Afrika dhe Azia.
Kjo tragjedi vjen në një kohë kur Greqia ka raportuar një rritje prej 25% të tentativave për kalim të paligjshëm këtë vit. Greqia ka qenë një nga vendet më të prekura nga fluksi i migrantëve, me mbi 1 milion njerëz që mbërritën në brigjet greke gjatë periudhës 2015-2016, shumica e të cilëve me gomone.
