Në stabilimentet e pularive, gripi i shpendëve ka treguar një agresivitet më të madh sesa në fermat e fshatarëve.
Gripi i shpendëve në Shqipëri ka sjellë gjithashtu një rritje të çmimit të vezëve. Shkatërrimi i 430 mijë pulave ka bërë që një kokërr vezë të kushtojë 66.6% më shumë, ose rreth 10 lekë më shumë për konsumatorin.
Sipas ekspertëve të bujqësisë, ky rritje çmimi është e paarsyeshme dhe shfaq elemente të abuzimit nga tregtarët.
“Rritja e çmimit është e papërmbajtur, pasi kemi 7 milionë pula, nga të cilat 5 milionë janë për prodhimin e vezëve. Mendoj se kjo është pasojë e formimit të monopoleve në tregun shqiptar. Pasi ka shumë pak kompani që merren me importin dhe eksportin e vezëve, çmimi vendoset lehtësisht nga këto kompani”, tha Ndoc Fasllia, ekspert i bujqësisë.
Megjithatë, asgjësimi i 430 mijë pulave deri tani nuk ka sjellë mungesë të vezëve në treg.
“Nëse situata përkeqësohet, mund të ndërhyjë Ministria e Bujqësisë për të ulur kostot e prodhimit ose për të marrë masa për zëvendësimin e shpendëve të humbur. Por aktualisht nuk jemi në këtë fazë, pasi dëmi është ende shumë i vogël”, shtoi eksperti i bujqësisë.
Kjo nuk është një situatë e panjohur as për biznesin e pularive, as për konsumatorët. Në vitin 2022, pas shpërthimit të gripit të shpendëve, u asgjësuan 500 mijë pula, duke e çuar çmimin e vezës në 30 lekë për kokërr në market, ndërsa vezët e fshatit arritën 50 lekë.
