Një 40-vjeçar nga Korça, Ledion Meçollari, ka humbur jetën mëngjesin e sotëm në spitalin rajonal, ku ishte shtruar një ditë më parë në gjendje kritike.
Ai u gjet në rrugë me simptoma të rënda dhe u transportua menjëherë në urgjencë. Sipas mjekëve, Meçollari ishte në gjendje të dehur dhe përdorues i lëndëve narkotike.
Pavarësisht trajtimit në reanimacion, gjendja e tij u përkeqësua dhe 40-vjeçari ndërroi jetë.
Burimet mjekësore bëjnë të ditur se në trupin e viktimës nuk janë konstatuar shenja dhune, ndërsa dyshohet se vdekja ka ardhur si pasojë e kombinimit të alkoolit dhe substancave narkotike.
Rreth një muaj më parë, Meçollari kishte tentuar vetëvrasjen duke u hedhur nga ballkoni i banesës, një episod i rëndë që ndodhi në prani të familjarëve të tij.
Ngjarja e sotme ka tronditur familjen, e cila tashmë ndodhet në gjendje të rëndë emocionale.
Autoritetet po vijojnë hetimet për të sqaruar rrethanat e plota të vdekjes.
