Policia italiane ka arrestuar një 35-vjeçar shqiptar, i cili ishte shpallur në kërkim prej tre vitesh nga autoritetet shqiptare.
Sipas raportimeve, arrestimi i shqiptarit, identiteti i të cilit s’bëhet me dije, është bërë në Moncalieri, Itali. Në momentin e ndalimit, shqiptari u ka paraqitur efektivëve një kartë identiteti dhe një patentë spanjolle.
Pas shoqërimit në komisariatin e policisë në Torino dhe kryerjes së verifikimeve të mëtejshme, rezultoi se dokumentet e paraqitura ishin plotësisht të falsifikuara dhe ishin përdorur për të shmangur kontrollet brenda vendeve të Evropës.
Hetimet zbuluan gjithashtu se 35-vjeçari ishte në kërkim ndërkombëtar nga autoritetet shqiptare, pasi akuzohet për pjesëmarrje në grup kriminal, përfshirje në vrasje, posedim të paligjshëm armësh dhe sigurim mjetesh për veprimtari kriminale.
Ai ishte dënuar nga Gjykata e Tiranës me tre vite e katër muaj burg. Ndërkohë, pritet ekstradimi i tij drejt Shqipërisë.
