Banorët e fshatit Zvezdë në Bashkinë e Maliqit prej 30 vitesh kanë vuajtur mungesën e ujit të pijshëm, ndërsa rreth dy javë më parë Ujësjellësi i Korçës “u kujtua” dhe nisi projektin për ta.
Por, duket se punimet po bëhen sa për të kaluar radhën dhe kjo ka bërë që banorët e fshatit të dalin paraditen e kësaj të diele në protestë.
Ata pretendojnë se që në fillim duket se cilësia e punimeve është shumë e dobët dhe skandaloze. Po ashtu, banorët thonë dhe se punët po bëhen “pa radhë”, pasi në këtë fshat nuk janë bërë ende kanalizimet e ujërave të zeza, për të nisur më pas me ujin e pijshëm.
Sipas tyre, asnjë përfaqësues i pushtetit vendor nuk ka shkuar te dëgjoje ankesat e tyre ndërsa kanë frikën se pavarësisht investimit, do të ngelen përsëri pa ujë, për shkak të punimeve të dobëta.
Ata kërkojnë të njihen me projektin si komunitet dhe depozita të bëhet në fshatin Zvezdë pasi ky fshat ka burime të bollshme për furnizimin me ujë dhe jo në fshatin Burimas atje ku është planifikuar në projekt.
