Kryetari i Partisë Demokratike, Sali Berisha në tryezën e përbashkët me deputetë dhe ekspertë të fushës, rreth projekt-buxhetit 2025, iu referua situatës së rënduar ekonomike dhe sociale në Shqipëri, të cilën e cilësoi si një emergjencë kombëtare.
Sipas liderit të PD-së, Sali Berisha, varfëria dhe mjerimi kanë prekur 46% të shqiptarëve, ndërsa pensionistët janë grupi më i goditur nga inflacioni, me fuqinë e tyre blerëse të reduktuar ndjeshëm krahasuar me 2013.
Shumë prej tyre nuk arrijnë të sigurojnë ushqimin bazë, për shkak të çmimeve të larta që janë shpesh më të shtrenjta se ato në disa vende të BE-së, sipas tij.
Berisha theksoi se, 12 vite më parë, Shqipëria ishte ndër vendet me shpërndarjen më të mirë të të ardhurave në rajon, falë rritjes së pagave, pensioneve, uljes së taksave dhe investimeve në infrastrukturë.
Ndërkohë, sot, vendi renditet i fundit në rajon për paga dhe pensione. Sipas Berishës, pabarazia ka arritur nivele ekstreme, me diferenca të theksuara mes rrogave të larta dhe pensioneve minimale.
PD angazhohet të përmbysë këtë model të shpërndarjes së të ardhurave, duke synuar drejtësi dhe barazi më të madhe ekonomike, në përpjekje për të adresuar varfërinë dhe për të rikthyer kohezionin social.
Kryetari i PD, Sali Berisha trajtoi angazhimet e PD-së për të përmirësuar jetesën e shqiptarëve. Kryedemokrati premtoi vendosjen e një minimumi jetik prej 200 eurosh për ata që marrin më pak ose asgjë, dhe një rrogë minimale prej 500 eurosh, si dhe rritjen e pensioneve me 20%, me synimin për dyfishimin e tyre. Ai theksoi gjithashtu rritjen e rrogës mesatare në 1200 euro.
Berisha kritikoi shpërdorimet aktuale, duke përmendur shpenzimet e larta për projekte publike dhe ndërtimin e rrugëve, krahasuar me vendet e rajonit si Kroacia. Kryedemokrati tha se Shqipëria ka pasuri të pafundme dhe burime të mjaftueshme për të përmbushur këto premtime, duke u zotuar për një shpërndarje më të drejtë të të ardhurave dhe një filozofi ekonomike humane, duke i dhënë përparësi mirëqenies së qytetarëve.
Lideri opozitar, Sali Berisha kritikoi ashpër keqmenaxhimin aktual ekonomik dhe buxhetor, duke theksuar korrupsionin dhe shpërdorimin në projekte infrastrukturore si Unaza e Tiranës dhe tuneli i Llogarasë. Ai premtoi një fokus të ri te qytetarët, bujqësia dhe zhvillimi i qëndrueshëm.
Berisha shpalosi planet e PD-së për rikthimin e subvencioneve të fuqishme për fermerët, mbështetjen e prodhimeve bujqësore dhe orientimin drejt kultivimit të druve frutorë e ullinjve. Ai premtoi një politikë të taksave të ulëta për të rritur mirëqenien dhe për të stimuluar zhvillimin ekonomik.
Kryetari i PD, Sali Berisha, foli mbi nismën e “Ballkanit të Hapur,” duke e quajtur një kapitull të zi që dëmtoi mijëra ferma shqiptare për shkak të mungesës së mbrojtjes dhe kuotave për prodhimet vendase. Berisha garantoi një mbështetje të re për bujqësinë, duke arkivuar këtë projekt dhe duke i dhënë përparësi zhvillimit të sektorit rural në Shqipëri.
Berisha kritikoi menaxhimin e pronave nga qeveria, duke akuzuar Ramën për rikthimin e praktikave të konfiskimit të vitit 1946, ku denoncoi edhe shpërdorimin e tokave publike, përfitimet e individëve të lidhur me qeverinë dhe shkatërrimin e potencialeve të jugut të Shqipërisë.
Kreu i PD, Sali Berisha premtoi rikthimin e pronës dhe kompensimin e pronarëve përmes tokës publike dhe kompensimit financiar. Po ashtu, garantoi zgjidhjen e përfundimtare të dëmshpërblimeve për të përndjekurit politikë.
Berisha nënvizoi arsimin dhe shëndetësinë si përparësi absolute dhe prezantoi amendamente të PD-së si bazë për ndryshimet ligjore emergjente pas fitores së ardhshme.
Kryedemokrati, Sali Berisha e konsideron PD të gatshme për të përballuar sfidat dhe për të përmbysur “12 vitet e humbura.”
