Një 14-vjeçar në Durrës është prekur nga meningiti akut. Ai është shtruar që ditën e premte në spitalin e Durrësit dhe më pas është dërguar në QSUT në Tiranë.
Merita Bekteshi drejtoresha e shkollës “Kushtrimi i Lirisë” tha se gjendja e nxënësve nuk është e mirë dhe se sot ka pasur shumë mungesa pasi prindërit janë në panik. Ajo ka shprehur se 14-vjeçari ka qenë në shkollë të premten dhe nuk ka pasur shenja gripi ose diçka tjetër. Drejtoresha nënvizoi se ky është rasti i dytë që ka ndodhur në Durrës dhe kjo është shqetësuese.
“Jemi vënë në dijeni mbrëmjen e djeshme (e hënë) pas procesit mësimor. Shkolla jonë bën mësim turn i dytë dhe e kemi mbaruar mësimin në 17:30 dhe në orën 19:00 jam vënë në dijeni nga mjekja epidemiologe e se nxënësi i klasës 8 B me iniciale H.A. ka dalë pozitiv me meningjit bakterial.
Mësimi vazhdon në shkollën “Eftali Koçi”, e cila është shkollë pritëse për klasat e shkollës “Kushrimi i Lirisë”, e cila po i nënshtrohet rikonstruksionit, ndaj bëjmë mësim turn i dytë.
Të premten ka qenë në shkollë nxënësi dhe nuk ka pasur shenja të gripit apo dicka tjeter. Sëmundja ka evuluar të shtunën e të dielën. Mjekja e NjVShK më ka thënë që nxënësit e klasës dhe mësuesit që kanë dhënë mësim në atë klasë duhet të marrin antibiotik. Ditën e sotme, mqs këtu bëjmë mësim dy shkolla, pyeta vetë nëse duhet bërë dezinfektim në shkollë, por më thanë që nuk është e nevojshme.
Sot, siç e prisnim në klasën e 8-të B, ka patur shumë mungesa në klasë për shkak të panikut. Gjendja e nxënësit të sëmurë është problematike dhe normal që prindërit e tjerë janë të shqëtësuar. Gjendja është kjo që është, por mendoj se s’ka nevojë për panik tek nxënësit e tjerë. Ky është rasti i dytë që ndodh në Durrës dhe është shqetësuese. Uroj që fëmija të shërohet”, shprehet drejtoresha Bekteshiu.
