Sekretari i Përgjithshëm i PD, Flamur Noka kishte të njëjtin qëndrim për humbjen e zgjedhjeve si Sali Berisha. Sipas tij votat janë vjedhur dhe se zgjedhjet e 11 majin ishin “një masakër”.
Para nisjes së mbledhjes më drejtuesit e qarqeve, Noka tregoi një rast, ku sipas tij janë dhënë 10 mijë euro për një fis që të mos dalë të votojë.
Sipas tij, vjedhjet e qeverisë dhe krimi janë rritur, ndërsa votat i shtohen.
“Masakra ka vetëm një emër, masakër. Para, banda, krimi i organizuar, drogë. E gjitha administrata në shërbim të votuesve.
Si shpjegohet që një qeverisje keq e më keq shkon dhe lart e më lart me vota shkon?! Si e shpjegoni ju që rritet vjedhja pa fund, rritet krimi dhe këta shtojnë votat?!
Kanë blerë dhjetëra mijëra karta për të ndenjur qytetarët në shtëpi. Më thoshte një miku im, kryetar i një dege, në Selenicë, po e pyesja për një fshat që unë e di që janë të djathtë. I thashë si shpjegohet. I thirra gjithë ditën në telefon, nuk me erdhën. Kur të nesërmen takova njërin nga anëtarët e fisit. Më tha më erdhën dhe me dhanë 10 mijë euro. Më thanë mos dil në votim. 10 mijë euro për fisin”, tha Noka.
