Eksperti i ekonomisë, Klodian Muço, i ftuar në emisionin “Shije Shtëpie”, solli një panoramë të qartë mbi disa nga treguesit kryesorë ekonomikë dhe socialë në Shqipëri. Ai theksoi se ndonëse të ardhurat mesatare për frymë janë në rritje dhe paga mesatare ka arritur në rreth 88 mijë lekë të reja, një pjesë e konsiderueshme e shoqërisë rreth 1/3 vijon të jetojë në kushte mbijetese.
Shqiptarët shpenzojnë ende një përqindje të lartë të të ardhurave për nevoja bazë si ushqimi dhe arsimi, duke treguar se distanca me vendet e Bashkimit Europian mbetet e ndjeshme.
“Shoqëria shqiptare është një vijë mesatare, të ndërmjetme. Në fakt kemi një pjesë të rëndësishme të shoqërisë shqiptare, 1/3 që janë në kushtet e mbijetesës. Por në kompleks të ardhurat mesatare shqiptare për frymë kanë një tendencë në rritje, sidomos në vitet e fundit. Paga mesatare në kohët që po flasim ka shkuar rreth 88 mijë lekë të reja. Sigurisht që vazhdojmë të jemi shumë larg vendeve të Bashkimit Europian.
Duhet të theksojmë që vitet e fundit ka pasur dhe një rritje të çmimeve. Sot që po flasim të dhënat e INSTAT tregojnë që 39.7% e të ardhurave të një familjeje shkojnë për konsumin ushqimor, dhe të pijeve joalkolike, para disa vitesh ishim rreth 41%. Megjithatë vazhdojmë akoma që të jemi larg, larg mesatares së BE-së. Aspekt tjetër po kaq i rëndësishëm është edhe pjesa e arsimimit.
Arsimi në vendet e BE-së kushton tek buxheti familjar rreth 4%.Ndërsa në Shqipëri pesha e arsimit zë rreth 12% të buxhetit familjar. Pra ne harxhojmë tre herë më shumë për arsimimin e fëmijës. Ndoshta ka të bëjë edhe me kulturën tonë që ne shpenzojmë më shumë se sa duhet për arsimimin e fëmijës”, tha eksperti i ekonomisë
