Me largimin e konfirmuar të Carlo Ancelottit në fund të këtij sezoni në La Liga, Real Madridi ka gati pasuesin e tij: Xabi Alonso. Lajmin e ka konfirmuar vetë eksperti i merkatos, Fabrizio Romano, me formulën e tij të famshme “Here we go”, duke zyrtarizuar marrëveshjen.
Kontrata e Alonsos deri në 2028
Pas njoftimit të fundjavës së kaluar për largimin nga Bayer Leverkusen dhe një përshëndetje emocionale me tifozët në ndeshjen e fundit në shtëpi, tashmë është bërë zyrtare se ish-mesfushori spanjoll ka firmosur me “Los Blancos”.
Ai ka nënshkruar një kontratë trevjeçare me Real Madridin, e vlefshme deri në vitin 2028. Të gjitha detajet janë mbyllur, përfshirë edhe stafin teknik që do e shoqërojë në këtë aventurë të re. Plani është që Alonso të nisë punën menjëherë pas përfundimit të sezonit, për të qenë gati për Kupën e Botës për Klube që zhvillohet muajin tjetër.
Mbyllja e sezonit dhe nisja e një epoke të re
Leverkusen luan ndeshjen e fundit të sezonit më 17 maj, ndërsa Real Madridi më 25 maj. Pas kësaj, Alonso pritet të marrë zyrtarisht drejtimin e ekipit.
Ndërkohë, pritet që edhe njoftimi për largimin e Ancelottit të vijë shumë shpejt, me trajnerin italian që pritet të nënshkruajë me kombëtaren e Brazilit.
Edhe pse është në hapat e parë të karrierës si trajner në nivelet më të larta, Alonso ka shkëlqyer me Bayer Leverkusenin duke fituar dy trofe të rëndësishëm sezonin e kaluar dhe duke arritur deri në finalen e Europa League. Këtë sezon ai e mbylli në vendin e dytë në Bundesliga dhe u eliminua në 1/8 e Champions-it nga Bayern Munich.
Tashmë, në “Santiago Bernabéu” po nis një epokë e re nën drejtimin e Xabi Alonsos, me pritshmëri të mëdha për ndryshime taktike dhe stilistike në lojën e Real Madridit.
