Zjarri që ka përfshirë Parkun Kombëtar të Lurës vijon të jetë aktiv, ndërsa forcat në terren po përballen me vështirësi të mëdha për ta izoluar atë. Era e fortë dhe terreni i thepisur kanë penguar ndërhyrjen efektive për shuarjen e flakëve, të cilat janë përhapur në një zonë me bimësi të rrallë, përfshirë ah, pisha dhe barishte.
Vatra e zjarrit është aktive dhe po merr përmasa më të mëdha, ndërsa sipërfaqja e djegur mendohet të jetë e konsiderueshme, megjithëse ende nuk ka një përllogaritje zyrtare.
Në operacion janë angazhuar 6 efektivë të shërbimit zjarrfikës, 16 nga ADZM, 5 punonjës të njësisë administrative Lurë, 12 vullnetarë dhe 30 trupa të Forcave të Armatosura. Pavarësisht përpjekjeve intensive, për shkak të kushteve të vështira në terren dhe motit, situata mbetet e paqëndrueshme.
