Europa Jugore dhe Ballkani po përballen me një valë zjarresh shkatërruese, të nxitura nga temperaturat ekstreme dhe thatësira. Prej muajit Korrik, Europa dhe Ballkani po «përvëlohen» nga flakët e zjarrit që përhapen edhe me shumë nga era e fortë.
Për shkak të situatës së rënduar janë shënuar dhe viktimat e para.
Në Spanjë, dy persona kanë humbur jetën, përfshirë një zjarrfikës vullnetar në Castile-León. Mijëra banorë janë evakuuar nga rajonet Galicia, Andalusia dhe Castilla y León, ndërsa dhjetëra mijëra hektarë janë përfshirë nga flakët. Autoritetet e lidhin situatën me krizën klimatike.
Në Greqi, situata është alarmante në zonat rreth Patras, si dhe në ishujt Zakynthos dhe Chios. Mijëra zjarrfikës dhe avionë janë angazhuar për të ndalur përhapjen e zjarreve, të cilat po rrezikojnë zona të banuara dhe turistike.
Në Shqipëri dhe rajon, janë regjistruar disa vatra aktive, përfshirë humbjen e jetës së një të moshuari nga tymi. Zjarre janë raportuar edhe në Turqi, Maqedoninë e Veriut dhe Mal të Zi.
Bashkimi Europian ka aktivizuar mekanizmat e emergjencës për të ndihmuar me ekipe zjarrfikësish dhe mjete ajrore në vendet dhe zonat që kanë nevojë.
