Një ngjarje e rëndë ka ndodhur mesditën e sotme në qendër të Tiranës, ku sipas raportimeve bëhet e ditur se është zhdukur pa gjurmë Daniel Shima, ish-zv.drejtori i Përgjithshëm i Agjencisë Kombëtare të Shoqërisë së Informacionit (AKSHI), i larguar nga kjo detyrë rreth dy vite më parë.
Sipas informacioneve të para, kontakti i fundit i Shimës me familjen ka qenë rreth orës 13:30, kur ai ka komunikuar përmes telefonit duke thënë se ishte ndaluar nga Policia dhe se po arrestohej. Por, pas verifikimeve pranë institucioneve përkatëse, familjarët konstatuan se nuk ka asnjë të dhënë zyrtare për ndalimin apo arrestimin e tij. Më pas, ata kanë bërë denoncimin për zhdukjen e tij.
Jozyrtarisht institucionet bëjnë me dije se po hetohen dy pista kryesore: një pengmarrje e mundshme ose një inskenim i zhdukjes nga vetë Shima.
Kush është Daniel Shima?
Daniel Shima ka mbajtur postin e zëvendësdrejtorit të AKSHI-t, institucionit që mbikëqyr dhe zhvillon sistemet e teknologjisë së informacionit në administratën shtetërore. Ai ka qenë një nga figurat më të rëndësishme në këtë strukturë, duke raportuar direkt tek drejtoresha Mirlinda Karçanaj.
Shkarkimi i tij ndodhi disa muaj më parë, në të njëjtën ditë kur Karçanaj u thirr për disa orë në Prokurorinë e Posaçme (SPAK), më 19 mars 2024. Menjëherë pas përfundimit të marrjes në pyetje, ajo është kthyer në zyrë dhe ka firmosur shkarkimin e Shimas.
Hetimet për zhdukjen e tij vijojnë, ndërsa ende nuk ka një pistë të konfirmuar përfundimisht nga autoritetet.
