Përfaqësuesja e Lartë për Politikë të Jashtme e BE-së, Kaja Kallas dhe Komisionerja për Zgjerim Marta Kos, kanë dalë në një deklaratë të përbashkët në lidhje me procesin zgjedhor në Kosovë. Zyrtaret e BE-së kanë konstatuar se zgjedhjet në Kosovë ishin të qeta dhe konkurruese.
Nga Misioni Vëzhgues Zgjedhor i Bashkimit Evropian thuhet në deklaratë se janë nxjerrë rekomandime. Në deklaratë theksohet se procesi i përgjithshëm tregoi qëndrueshmëri dhe përkushtim ndaj parimeve demokratike.
“Sipas konstatimeve preliminare, zgjedhjet kanë qenë të qeta dhe konkurruese me pjesëmarrjen e të gjitha komuniteteve, ndërsa është zbatuar ligji i ri zgjedhor. Fushata ishte e gjallë. Procesi i përgjithshëm tregoi qëndrueshmëri dhe përkushtim ndaj parimeve demokratike”, thuhet në deklaratë.
Më tej në deklaratë, thuhet se presin formimin e Kuvendit dhe Qeverisë së re për të vazhduar angazhimin, me synim për të mbështetur Kosovën për t’u afruar me BE-në, në mënyrë që të përfitohet nga Plani i Rritje. Edhe në këtë deklaratë, bëhen të qarta pritjet që BE-ja ka që Kosova të zbatojë obligimet nga Marrëveshja për Normalizim të marrëdhënieve me Serbinë.
“Progresi në normalizimin e marrëdhënieve me Serbinë është mënyra e vetme që Kosova të arrijë progres në rrugën e saj evropiane. Kosova pritet të zbatojë obligimet e saj që dalin nga Marrëveshja për Rrugën e Normalizimit, si dhe të gjitha marrëveshjet e kaluara të Dialogut pa vonesa apo parakushte të mëtejshme. Nuk ka alternativë për Dialogun e lehtësuar nga BE”, thuhet në deklaratë.
