Më 9 nëntor, 5 bashki të vendit i drejtohen kutive të votimit për të zgjedhur kryebashkiakët e rinj. Vlora, Tepelena, Berati, Mati dhe Cërriku janë 5 bashkitë aktualisht pa kryetar bashkie. Ndërsa për Tiranën zgjedhjet u pezulluan pas vendimit të Gjykatës Kushtetuese, e cila riktheu Erion Veliajn në detyrë.
Brunilda Mersini, kandidatja e PS për bashkinë e Vlorës, Gramoz Sako, kandidat për Tepelenën, Ervin Cece, kandidat për Beratin. Altin Bojni, kandidat për Matin dhe Florenc Doka, kandidat për bashkinë e Cërrikut ditën e sotme iu bashkuan podcastit “Flasim” të kryeministrit Rama.
Të pestë kandidatët u shprehën optimist lidhur me rezultatin e zgjedhjeve të 9 nëntorit. Ata shprehën bindjen se do të korrin fitore të thellë.
Brunilda Mersini: Është një sfidë. E gjej veten të përgatitur sepse kam menduar fort që njerëzit që ëndërrojnë për ndryshim dhe për mirë, duhet të jenë njerëz që sakrifikojnë komoditetin. Besoj fort që në këtë vend gjërat që ndodhin varen gjithmkonë nga ne. Doja të isha pjesë e këtij ndryshimi për mirë në qytet. E diela do të jetë një ditë tjetër për qytetin tim, qytetin që ka treguar së ka një kulturë qytetare, zgjedhjet e 11 majit e treguan se angazhimi politik ishte serioz dhe prodhoi 9 mandate.
Gramoz Sako: Nga takimet që kemi zhvilluar në qytet, investimet që ka bërë PS në gjithë mandatet që ka drejtuar Tepelenën, mendoj që do kemi një fitore të thellë të dielën. Do votohet bindshëm PS. Këtë e mbështes te opinionet, takimet, njerëzit që kemi takuar. Jam besimplotë që do marrim rezultat pozitiv.
Ervin Cece: Situata është pozitive, njerëzit vlerësojnë punën që është bërë në qytet, vlerësojnë projektet. Kjo u tregua edhe më 11 maj, ku Berati nxori 5 mandate. E shoh që e mirëpresin dhe kandidaturën time. Jam besimplotë që do kemi një rezultat të mirë.
Altin Bojni: Do jetë një rezultat i mirë sepse matjanët dinë ta vlerëosjnë punën e bërë gjatë këtyre ditëve. Mati do votojë me një rezultat të thellë sepse meriton vazhdimësinë e këtyre punëve që janë bërë deri më sot.
Florenc Doka: Bashkia Cërrik ka pasur vëmendje të shtuar në këto zgjedhje të pjeshme. Qytetarët e Cërrikut kanë vlerësuar kandidimin tim. Me siguri do jemi në garë të plotë për rezultatin maksimal.
Kreu i qeverisë, Edi Rama, duke ironizuar opozitën tha se halli i tyre pas zgjedhjev do të jetë “kujt t’ia lënë humbjen në derë”.
