Ukraina dhe Shtetet e Bashkuara mund të nënshkruajnë një memorandum mirëkuptimi gjatë ditës së sotme për marrëveshjen e mineraleve që dy vendet po negociojnë aktualisht, tha sot presidenti ukrainas Volodymyr Zelensky.
Presidenti amerikan Donald Trump po e kërkon këtë marrëveshje si kompensim për ndihmën e dhënë Ukrainës nga paraardhësi i tij, Joe Biden, që nga fillimi i pushtimit rus tre vjet më parë.
Në të njëjtën kohë, presidenti ukrainas deklaroi se Kievi ka informacione të inteligjencës që tregojnë se Kina po furnizon Rusinë me artileri dhe barut.
“Ne besojmë se përfaqësuesit kinezë janë të angazhuar në prodhimin e armëve të caktuara në territorin e Rusisë ,” tha ai në një konferencë shtypi në Kiev. Ai nuk specifikoi nëse kishte parasysh sistemet e artilerisë apo raketat.
Zelensky paralajmëroi gjithashtu se Rusia duket se po grumbullon 60,000 trupa pranë Sumy-t, ndërsa ai gjithashtu sulmoi drejtpërdrejt të dërguarin amerikan Steve Witkoff, duke e akuzuar atë për “përhapjen e narrativave ruse” për luftën dhe duke theksuar se Ukraina nuk do të diskutojë çështje territoriale derisa të hyjë në fuqi një armëpushim.
