Presidenti i Ukrainës do të takohet ditën e nesërme me homologun francez, Emmanuel Macron në Paris përpara zhvillimit të samitit të Koalicionit të Vullnetit.
Lajmin e ka bërë të ditur këshilltari diplomatik i presidentit francez, Emmanuel Bonne, gjatë një konference për shtyp.
“Presidenti Macron do të takohet me Presidentin Zelensky nesër në mbrëmje në Paris, përpara takimit me të gjithë partnerët tanë”, tha Bonne.
Ai shtoi se Macron do të dërgojë një mesazh se Franca, si një vend që dëshiron dhe është në gjendje t’i ofrojë garanci sigurie Ukrainës, mbetet e përkushtuar ndaj detyrimeve të saj ndaj Ukrainës.
Bonne theksoi gjithashtu rëndësinë e rolit të Presidentit Francez në koalicion: “Ju kujtohet që në vitin 2024, Presidenti iu përgjigj një pyetjeje në lidhje me mundësinë e vendosjes së garancive të sigurisë për Ukrainën, të cilat u perceptuan ndryshe. Tani, një vit e gjysmë më vonë, 30 vende po punojnë për garancitë e sigurisë dhe ne po e bëjmë këtë në koordinim të plotë me të gjithë partnerët tanë evropianë, si dhe aleatët tanë amerikanë”.
Siç është raportuar, Presidenti francez Emmanuel Macron dhe Kryeministri i Mbretërisë së Bashkuar Keir Starmer do të bashkë-drejtojnë takimin e Koalicionit të Vullnetit në Pallatin Élysée të enjten.
