Presidenti ukrainas Volodymyr Zelensky deklaroi se një marrëveshje paqeje për të përfunduar luftën me Rusinë është “90% e gatshme”, në një fjalim për Vitin e Ri që u përqendrua kryesisht në rezistencën ndaj invazionit të plotë nga Moska. Ai theksoi se 10% e mbetur e marrëveshjes do të përcaktojë fatin e paqes, fatin e Ukrainës dhe të Europës.
Në të njëjtën kohë, presidenti rus Vladimir Putin iu drejtua trupave të tij, duke shprehur besimin në fitoren e tyre. Rusia gjithashtu publikoi dëshmi të asaj që ajo pretendoi si përdorim dronësh nga Ukraina për të sulmuar shtëpinë e Putin në Liqenin Valdai. Ukraina e ka mohuar këtë pretendim, duke e cilësuar si të pabazuar. Kremlini tha se do të rishikonte pozitat e tij në negociatat për paqe si pasojë e këtyre akuzave.
Zelensky deklaroi se Ukraina nuk dëshiron paqe “me çmimin e çdo gjëje”, duke theksuar se një tërheqje nga rajoni lindor i Donbasit do të sillte përfundimin e vendit. Ai përmendi se aktualisht Rusia mban rreth 75% të rajonit të Donetsk dhe 99% të Luhanskut, duke nënvizuar se fatet e këtyre rajoneve kanë qenë një pengesë kryesore në negociata. Ai nguliti këmbë se qëllimet duhet të shndërrohen në garanci sigurie.
Zelensky gjithashtu përmendi një ofertë për garanci sigurie nga Shtetet e Bashkuara për 15 vjet, por pa një kohë të qartë për zbardhjen e kësaj oferte. Ai e theksoi se “nënshkrimet për marrëveshje të dobëta vetëm sa e nxisin luftën”.
Krahasimisht, fjalimi i Putin për Vitin e Ri ishte më i shkurtër. Ai përmendi përpjekjet për të mbështetur ata që kanë nevojë dhe lavdëroi ushtarët që marrin pjesë në “operacionin e veçantë ushtarak”. Nga ana tjetër, lideri korean Kim Jong Un lavdëroi aleancën mes Phenianit dhe Moskës.
Zelensky shprehu dëshirën për rifillimin e negociatave për paqe, me pjesëmarrjen e zyrtarëve të SHBA-së dhe Europës, ndërsa presidenti francez Emmanuel Macron njoftoi se do të bëhen angazhime konkrete për të mbrojtur Ukrainën dhe për të siguruar paqen në kontinent. Negociatat do të kërkojnë miratimin rus, për çka perspektivat nuk duken optimiste, sidomos pas incidentit të dronëve.
