Sot në Kiev, Presidenti i Ukrainës, Volodymyr Zelensky, i dorëzoi Ministres për Europën dhe Punët e Jashtme të Shqipërisë, Elisa Spiropali, dekoratën Urdhri i Princeshës Olga, Klasi I.
Ky vlerësim iu akordua për kontributin e saj të rëndësishëm në forcimin e bashkëpunimit ndërshtetëror dhe për mbështetjen e sovranitetit dhe integritetit territorial të Ukrainës.
Spiropali deklaroi se e pranoi këtë nderim në emër të gjithë qytetarëve shqiptarë, duke theksuar vlerat e solidaritetit dhe humanizmit që bashkojnë dy vendet.
Ajo u shpreh se Ukraina nuk është vetëm një fushëbetejë lufte, por edhe një provë për ndërgjegjen kolektive të Evropës dhe botës demokratike.
Duke cituar Heroin Kombëtar Gjergj Kastrioti Skënderbeun, Spiropali theksoi se e ardhmja ndërtohet nga vlerat dhe forca e njerëzve, jo nga armët.
Nga ana e tij, Presidenti Zelensky vlerësoi qëndrimin e qartë dhe parimor të qeverisë shqiptare dhe të Kryeministrit Edi Rama ndaj agresionit rus, duke falënderuar Spiropalin për angazhimin e saj të vazhdueshëm në mbështetje të Ukrainës.
Gjatë vizitës, Spiropali u takua edhe me homologun e saj ukrainas, Andrii Sybiha, me të cilin diskutoi për nevojën e një paqeje të drejtë që garanton siguri, kthimin e të burgosurve, hetimin e krimeve të luftës dhe vendosjen e përgjegjësisë ndaj agresorëve.
Ministrja vuri në dukje ndihmën humanitare të Shqipërisë për Ukrainën, pritjen e refugjatëve dhe kontributin në mbështetjen ushtarake në koordinim me NATO-n dhe partnerët e Bashkimit Evropian.
Gjatë takimeve u riafirmua rëndësia e integrimit evropian si faktor kyç për stabilitetin dhe prosperitetin e kontinentit.
Spiropali shprehu gatishmërinë e Shqipërisë për të mbështetur reciprocitetin e aspiratave evropiane të Ukrainës dhe Shqipërisë.
Vizita dhe ceremonia e dekorimit dëshmojnë për një përkushtim të fortë në forcimin e marrëdhënieve shqiptaro-ukrainase në një kontekst sfidash rajonale dhe globale.
