Evropa njihet për përparimin social dhe standardet e larta të jetesës. Sipas raportit të fundit të organizatës bamirëse “Children’s Society”, i cili mban titullin “Good Childhood Report 2024” shihet një ulje shqetësuese e niveleve të kënaqësisë së të rinjve me jetën e tyre. Konkretisht, 1 në 6 të rinj evropianë shprehin pakënaqësi për jetën që bëjnë. Sipas të dhënave të UNICEF-it, përqindja e të rinjve të kënaqur me jetën ka rënë nga rreth 74% në vitin 2018 në 69% në vitin 2022, në 23 vende të Evropës. Ky ndryshim alarmues thekson se sfidat socio-ekonomike kanë një ndikim të thellë në mirëqenien e gjeneratës së re.
Pamja bëhet më e zymtë në Mbretërinë e Bashkuar, ku 25.2% e të rinjve shprehin pakënaqësi me jetën e tyre. Situatë e ngjashme paraqitet në Poloni (24.4%) dhe Maltë (23.6%). Nga ana tjetër, të rinjtë më të lumtur duket se jetojnë në Holandë, ku vetëm 6.7% e 15-vjeçarëve shprehin nivel të ulët kënaqësie. Gjithashtu, Finlanda dhe Danimarka rezultojnë ndër vendet më pozitive, me përqindje pakënaqësie prej 10.8% dhe 11.3% respektivisht.
Varfëria, pabarazia dhe mungesa e shërbimeve të përballueshme për shëndetin mendor janë disa nga faktorët kryesorë që ndikojnë në mirëqenien e të rinjve. Varfëria, në veçanti, është e lidhur ngushtë me kënaqësinë. Sipas UNICEF-it, rreth 20 milionë fëmijë në BE jetojnë nën rrezikun e varfërisë ose të përjashtimit social. Interneti ka një ndikim të madh në jetën e të rinjve, por shpesh edhe negativ. Faktorë si bullizmi online, ekspozimi ndaj përmbajtjeve të papërshtatshme dhe keqinformimi kontribuojnë në rënien e shëndetit mendor të të rinjve.
Sipas Fabiola Bas Palomares, drejtuese e politikave në “Eurochild”, pasojat e përdorimit të tepruar të internetit janë të dukshme si varësia, izolimi dhe mungesa e besimit social. Ekspertët theksojnë se duhen ndërmarrë masa të menjëhershme nga qeveritë për të përmirësuar mirëqenien e të rinjve. Disa prej këtyre masave përfshijnë mbështetje për shëndetin mendor, minimizimi i përjashtimit social dhe lufta kundër varfërisë, me politika që sigurojnë qasje në nevojat bazë për çdo familje.
