Kafeja është ndër pijet më të preferuara në mbarë botën, e konsideruar shpesh si “pija magjike” e mëngjesit nga miliona njerëz. Por, çfarë ndodh me organizmin kur e konsumojmë atë me stomakun bosh?
Sipas burimeve nga HealthLine, fillimi i ditës me një filxhan kafe nuk është domosdoshmërisht i dëmshëm. Përkundrazi, ajo mund të përmirësojë humorin, të rrisë përqendrimin dhe të zgjojë mendjen. Nëse konsumohet pa qumësht apo sheqer, mund të ndihmojë edhe në humbjen e peshës dhe të ofrojë mbrojtje kundër sëmundjeve si diabeti dhe Alzheimer.
Megjithatë, pirja e kafesë me stomakun plotësisht bosh mund të shkaktojë probleme me tretjen. Në disa raste, mund të çojë në shqetësime si urthi, nauzea apo dispepsia, sidomos tek ata që janë më të ndjeshëm ndaj kafeinës. Për këta individë, këto simptoma mund të ndodhin rregullisht, pavarësisht nëse e pijnë kafen para apo pas ushqimit.
Duke qenë se çdo trup reagon ndryshe, është e rëndësishme që secili të vëzhgojë se çfarë i përshtatet më shumë. Nëse është e nevojshme, këshillimi me një nutricionist mund të ndihmojë për të marrë vendimin më të mirë për shëndetin.
