Një tjetër rast i tentativës për kultivim të bimëve narkotike është goditur nga Policia në qarkun e Fierit, në kuadër të operacionit policor të koduar “Koordinata”.
Shërbimet e Komisariatit të Policisë Mallakastër, në bashkëpunim me strukturat hetimore, kanë zbuluar dhe asgjësuar një parcelë me 1881 fidanë të dyshuar si cannabis sativa, të mbjellë në fshatin Çërrilë.
Gjatë ndërhyrjes së policisë, u kapën në flagrancë duke ujitur fidanët dy shtetas, të cilët janë vënë në pranga:
Arben Sulua, 53 vjeç, banues në Greshicë
Elidon Shehaj, 34 vjeç, banues në Çërrilë
Të arrestuarit do të përballen me akuzën për “Kultivim të bimëve narkotike”.
Në lidhje me këtë rast, u procedua penalisht kryeplaku i fshatit Çërrilë, shtetasi I. S., 63 vjeç, për veprën penale “Shpërdorim detyre”, pasi dyshohet për moskryerjen e detyrave funksionale dhe mosinformim të autoriteteve për parcelën me kanabis.
Gjithashtu, ka nisur procedimi penal ndaj shtetasit M. Z., 44 vjeç, banues në Ballsh, pasi gjatë kontrollit në banesën e tij, u sekuestruan:
një armë sportive
12.400 euro
400 paund
dhe rreth 900.000 lekë të reja, që dyshohet se janë përfituar nga kjo veprimtari kriminale.
Fidanët narkotikë janë asgjësuar me anë të djegies, ndërsa policia ka bërë të ditur se hetimet vijojnë për identifikimin dhe kapjen e personave të tjerë të përfshirë.
Policia e Mallakastrës thekson se operacionet do të vijojnë pa ndërprerje, me qëllim parandalimin dhe goditjen e çdo tentative për kultivim të bimëve narkotike.
