Shiko videon këtu!
Prej më shumë se 24 orësh, një video ka bërë xhiron e rrjetit, ku shfaqet një luan që kafshon në kokë një burrë, i cili tentoi ta përkëdhelte.
Në momentin e incidentit, ndërhyri i zotit të luanit, i cili e goditi me shuplakë kafshën, duke e detyruar atë të tërhiqej dhe duke mundësuar që burri të shpëtonte pa pësuar lëndime serioze.
Luani ndodhej në shkallët e një ballkoni të një vile, dhe nga biseda që dëgjohej, kuptohej se ngjarja kishte ndodhur në jug të vendit, por pa u përcaktuar saktësisht vendi.
Mediat raportojnë se luani që u bë viral ndodhet në fshatin Zharrëz të Fierit, ku një familje e mban si “mace shtëpie”. Ky fakt ishte i njohur nga të gjithë banorët e zonës, por askush nuk kishte denoncuar situatën tek autoritetet.
Pas publikimit të videos, thuhet se kafsha nuk është parë më në banesë, pasi është larguar nga të zotët e shtëpisë për shkak të frikës nga ndjekja ligjore.
Policia e Fierit raportohet se është angazhuar në bashkëpunim me autoritetet për largimin e kafshës nga ambientet e banimit dhe për ndëshkimin e përgjegjësve sipas ligjit. Megjithatë, deri tani nuk ka pasur asnjë komunikatë zyrtare.
Mbajtja e një kafshe të egër dhe të rrezikshme si luani në kushte shtëpie është jo vetëm e papërgjegjshme, por përbën edhe një kërcënim të drejtpërdrejtë për sigurinë publike.
