Durrës – Policia e Durrësit vijon operacionet e njëpasnjëshme për goditjen e veprimtarisë kriminale të prostitucionit, duke finalizuar fazën e 12-të të operacionit policor të koduar “Storm”.
Gjatë këtij operacioni, u arrestuan në flagrancë dy shtetase kolumbiane, J. C., 23 vjeçe dhe M. A., 25 vjeçe, të cilat u kapën në zonën e Vollgës, në lagjen nr. 1 të qytetit të Durrësit. Sipas policisë, dy të arrestuarat kishin marrë me qira një apartament në këtë zonë, të cilin e shfrytëzonin për ushtrim prostitucioni.
Operacioni u zhvillua nga Seksioni për Hetimin e Trafiqeve pranë DVP Durrës, në bashkëpunim me Forcën e Posaçme Operacionale, dhe u ndoq me metoda speciale hetimi për disa javë, për veprat penale “Prostitucioni” dhe “Përshtatja e ambienteve për prostitucion”.
Gjatë veprimeve policore, u proceduan penalisht në gjendje të lirë edhe 6 shtetas shqiptarë nga Durrësi, Shijaku dhe Kavaja, për veprën penale “Prostitucioni”.
Në cilësinë e provës materiale, policia sekuestroi dy pasaportat e shtetaseve të huaja, shuma parash në euro dhe lekë, si dhe 10 formularë dërgesash monetare me vlerë totale 15 093 euro, të dërguara familjarëve të tyre në Kolumbi brenda një periudhe 20-ditore.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme ligjore.
