Zv.presidenti i Interit, Javier Zanetti, foli përpara përfaqësuesve të “Inter Club” nga e gjithë bota, të ftuar nga klubi zikaltër brenda “San Siros”, disa orë para sfidës kundër Udineses për javën e 30-të të kampionatit. Bashkë me të ishte i pranishëm edhe presidenti Beppe Marotta. Këto janë fjalët e ish-kapitenit argjentinas, të raportuara nga faqja zyrtare e Interit:
“Është e mrekullueshme të jem këtu dhe gjithmonë emocionuese të shoh këtë dashuri për Interin. Të jemi kaq të shumtë është e rëndësishme, falë ‘Inter Club’ kemi arritur shumë kënaqësi. E dimë që tifozët janë gjithmonë pranë nesh dhe në këtë moment të sezonit ata bëhen vendimtarë.
Gjëja e parë që më vjen në mendje kur mendoj për ‘Inter Club’ lidhet me javën e kaluar. Gjatë ‘Infinity League’ në Mynih kishte një numër të madh tifozësh të Interit që na mbështesnin. Ka një dashuri të madhe për këto ngjyra kudo në botë. Kjo është pjesë e historisë dhe vlerave tona, diçka vërtet e rëndësishme.
Më shumë se 50 klube mbajnë emrin tim, të paktën një në çdo kontinent, është një lidhje shumë e veçantë që kemi. Jam këtu prej shumë vitesh, Interi është familja ime dhe vlerat tona bëjnë diferencën. Kudo që shkojmë, ndihemi si në shtëpi dhe jemi të përfaqësuar denjësisht”.
