Një nga tendencat më të fundit tek adoleshentët po ngjall shqetësim mes prindërve: ndarja e vendndodhjes në kohë reale. Aplikacione si Life360 dhe Snapchat Snap Map janë shumë të përdorura nga brezi Z, i cili po ndan vendndodhjen me miqtë më shumë se çdo grupmoshë tjetër. 94% e tyre besojnë se kjo praktikë u sjell përfitime në jetën e përditshme.
Instagrami gjithashtu po punon për të integruar një hartë vendndodhjesh të ngjashme me atë të Snapchat. Megjithatë, ndonëse kjo praktikë shihet si argëtuese ose si mënyrë për të ndjerë më shumë lidhje e siguri, ekspertët paralajmërojnë për rreziqet e mundshme të shëndetit mendor dhe sigurisë fizike.
Sipas psikologes Cameron Caswell, për shumë adoleshentë ndarja e vendndodhjes është “thjesht mënyrë për t’u ndjerë të lidhur me shoqërinë”. Por ajo shton se kjo mund të nxisë ndjesinë e përjashtimit dhe të rrisë frikën nga mungesa në aktivitete sociale.
Terapeutja Cheryl Groskopf thekson se kjo praktikë shpesh kthehet në mënyrë për të menaxhuar ankthin ose për të ushtruar kontroll social, duke u bërë burim mbikëqyrjeje emocionale. Ajo thekson se ndarja e vendndodhjes nuk duhet të përdoret për të provuar besnikëri ndaj dikujt tjetër.
Për vajzat, ndarja e vendndodhjes shpesh lidhet me ndjesinë e sigurisë, por kjo mund të kthehet në një armë në duart e njerëzve abuzues. Ekspertët theksojnë rëndësinë e vendosjes së kufijve dhe mësimit të adoleshentëve që të thonë “jo”, pa ndjerë faj apo frikë nga refuzimi.
Psikologët rekomandojnë që prindërit të mos ndalojnë menjëherë ndarjen e vendndodhjes, por të flasin hapur me fëmijët për arsyet pse e bëjnë këtë, të kontrollojnë me kujdes me kë ndajnë informacionin dhe të diskutojnë për rreziqet potenciale.
Në fund, ndarja e vendndodhjes mund të jetë mjet i dobishëm për siguri e lidhje sociale, por vetëm kur përdoret me ndërgjegjësim dhe në mënyrë të balancuar.
