Një nga talentet më të mira të futbollit botëror. Lamine Yamal, 17 vjeç, tashmë ka fituar një “letërsi” të vërtetë të përkushtuar ndaj tij. Historia e tij shumë e re ka tashmë faqet e para, kapituj dhe libra të shkruar për të. Prandaj Interi është sot më shumë se i paralajmëruar: përballë ka lojtarin e lindur në vitin 2007, nga Esplugues de Llobregat, i cili tashmë ka mposhtur të mëdhenjtë, ka udhëhequr Spanjën në fitimin e “Euro 2024”, ka fituar “Copa del Rey” si protagonist kundër Real Madridit. Ai shihet si një nga pasardhësit e paracaktuar të Lionel Messit dhe Cristiano Ronaldos.
Ja të gjitha rekordet e thyera prej tij tashmë:
Debutuesi më i ri në ekipin e parë: Debutoi me Barcelonën më 29 prill 2023, kundër Real Betisit, në moshën 15 vjeç, 9 muaj e 16 ditë (15 vjeç e 290 ditë), duke u bërë lojtari më i ri që ka debutuar për klubin katalanas në një ndeshje zyrtare të La Liga-s.
Titullari më i ri në La Liga, në shekullin XXI: Më 20 gusht 2023, në moshën 16 vjeç e 38 ditë, luajti si titullar kundër Cadiz, duke u bërë titullari më i ri në historinë e Barcelonës dhe të La Liga-s në shekullin XXI.
Shënuesi më i ri në La Liga: Shënoi golin e tij të parë në La Liga më 8 tetor 2023 kundër Granadës, në moshën 16 vjeç e 87 ditë, duke thyer rekordin e mëparshëm të Ansu Fati.
Debutuesi më i ri në Champions League për Barcelonën: Hyri në fushë kundër Antwerp më 19 shtator 2023, në moshën 16 vjeç e 68 ditë.
Titullari më i ri në Champions League: Më 4 tetor 2023, në moshën 16 vjeç e 83 ditë, ishte titullar kundër Portos, duke thyer rekordin e mëparshëm të Celestine Babayaro (16 vjeç e 86 ditë).
Shënuesi më i ri që ka realizuar një dopietë në La Liga: Më 11 shkurt 2024, në moshën 16 vjeç e 213 ditë, shënoi dy gola kundër Granadës, duke u bërë lojtari më i ri në historinë e La Liga-s që realizon dopietë.
Shënuesi më i ri në “Copa del Rey”: Më 25 janar 2024, në moshën 16 vjeç e 196 ditë, shënoi kundër Athletic Bilbaos në çerekfinale.
Shënuesi më i ri në “El Clásico”: Më 26 tetor 2024, në moshën 17 vjeç e 105 ditë, shënoi kundër Real Madridit, duke thyer rekordin e Ansu Fati (17 vjeç e 359 ditë).
Më i riu që ka shënuar dhe dhënë asist në një ndeshje të Champions League: Më 11 mars 2025, në moshën 17 vjeç e 241 ditë, realizoi një gol dhe dha një asist kundër Benfica, duke thyer rekordet e Breel Embolo dhe Ansu Fati.
Më i riu që regjistron pesë asiste në Champions League: Me asistin e tij të pestë në këtë kompeticion, dhënë kundër Benfica në mars 2025, theu rekordin e Theo Walcott (19 vjeç e 23 ditë).
A mund t’i arrijë të mëdhenjtë? Është ende herët për ta thënë, qëndrueshmëria e Cristiano Ronaldos dhe Lionel Messit luan sigurisht në favorin e tyre. Ata janë lojtarë që kanë shënjuar një epokë, më shumë se një dekadë. Nuk kanë qenë vetëm “rrufe” apo “ylberë”, por “qiell i yllëzuar”. Yamal ka pa dyshim moshën në favor të tij, por duhet të gjejë qëndrueshmëri dhe vazhdimësi, jetëgjatësi dhe siç u tha, durim. Nëse dita duket që në mëngjes, është në rrugën e duhur.
